மொட்டை மாடியில் ஐந்தாம் நாள்!

ஐந்தாவது நாள் நிகழ்வில் இந்துத்துவாவாதிகளின் வேட்டைக்காடாகிப் போனது மொட்டை மாடி.

 

ஐந்தாவது நாளான நேற்று செங்கிஸ்கான் நூலை ஐகாரஸ் பிரகாஷ் வெளியிட பத்திரிகையாளர் முத்துராமன் பெற்றுக் கொண்டார். இருளர்கள் ஓர் அறிமுகம் நூலை sishri.orgயை சார்ந்த ப்ரவாஹன் வெளியிட கணேசன் பெற்றுக் கொண்டார்.

 

இதன் பின்னர் மதிப்புரை ஆரம்பமானது. சாதாரணமாகப் பேசும்போதே நகைச்சுவை ததும்ப பேசும் ஐகாரஸ் ஏனோ கொஞ்சம் அடக்கி வாசித்தது போலவே இருந்தது. அடக்கி வாசித்தலையும் மீறி மங்கோலிய குழுக்களை குறிப்பிடும்போது தமிழக காங்கிரஸோடு ஒப்பிட்டது கைத்தட்டலை அள்ளியது. கிழக்குப் பதிப்பகத்தின் நூல்நடை பற்றி தனக்கு விமர்சனங்கள் இருப்பதாக சொன்னார். நூலாசிரியர் முகிலின் உழைப்பை பாராட்டி வாழ்த்தினார்.

 

அடுத்ததாக இருளர்கள் ஓர் அறிமுகம் நூலை மதிப்புரை செய்ய ப்ரவாஹன் வந்தார். பேச்சின் ஆரம்பத்திலேயே மனுதர்ம விசுவாசி என்பதை புரிந்துகொள்ள முடிந்தது. விமர்சனத்திலும் சரி, பின்னர் நிகழ்ந்த விவாதங்களிலும் சரி. ஆரியர்களைப் போல திராவிடர்களும் வந்தேறிகள் என்று நிறுவ ரொம்பவும் மெனக்கெட்டார். அவர் செய்தது மதிப்புரை என்பதை விட காழ்ப்புரை என்று சொல்வதே பொருத்தம். நூலின் ஒவ்வொரு பக்கத்தையும் கிட்டத்தட்ட நிராகரித்தே பேசிக்கொண்டிருந்தார்.

 

போதிய தரவுகள் இல்லை, அனுமானத்தின் பேரில் எழுதப்பட்டிருக்கிறது என்கிற ரீதியில் போய்க்கொண்டிருந்த அவரது எதிர்விமர்சனங்களுக்கும் எந்த தரவுகளையும் அவர் குறிப்பிடவில்லை என்பது குறிப்பிடத்தக்கது. புத்தகத்தில் ஆரியம், திராவிடம் தொடர்பான பக்கங்களை பற்றி குறிப்பிடும்போது அவரது பேச்சில் பதட்டம் தெரிந்ததாக உணர்ந்தேன். பதிப்பகம் இதை விஷயம் தெரிந்தவர்களிடம் கொடுத்து சரிபார்த்திருக்க வேண்டும் என்று இருமுறை சொன்னார். பழங்குடியினர் தொடர்பான ஒரு நூலை மதிப்புரை செய்ய கிழக்கு பதிப்பகத்தாருக்கு ஒரு மனுதர்மவாதி தான் கிடைத்தாரா என்று நொந்துக் கொண்டேன்.

 

'இருளர்கள் - ஓர் அறிமுகம்' நூல் கிழக்குப்பதிப்பகம் எட்டியிருக்கும் ஒரு மைல்கல். ஒரு வழக்கின்போது வழக்கறிஞரால் இந்நூல் இருளர்கள் தொடர்பான ஆதாரமாகவே எடுத்து வைக்கப்பட்டிருக்கிறது என்பது நூலாசிரியருக்கு மட்டுமல்ல, பதிப்பகத்துக்கும் பெருமை சேர்க்கும் விஷயம். இந்நூலை எழுதிய எழுத்தாளர் குணசேகரன் இடதுசாரி சிந்தனையாளர் என்பதாலோ என்னவோ ப்ரவாஹன் தனது மதிப்புரையின் ஆரம்பத்திலேயே இடதுசாரி சிந்தனைகளை கேலி செய்து சூடுவைத்துப் பேசினார். இந்நூலை நான் இன்னமும் வாசிக்கவில்லை என்றாலும் இதுவரை வாசித்தவர்களின் பார்வையில் இந்நூல் மிகச்சிறப்பாக வந்திருப்பதாக அறிந்திருந்த வேளையில், ப்ரவாஹனின் மதிப்புரை எனக்கு கோபத்தையே ஊட்டியது. மிகச்சுலபமாக குணசேகரின் பல ஆண்டுகள் உழைப்பை அவர் நிராகரித்த விதம் எனக்கு அதிருப்தியையும் ஏற்படுத்தியது. குணசேகர் பழம்பெரும் கம்யூனிஸ்ட்டு தலைவர் டாங்கே அவர்களின் கொள்ளுப்பேரன் என்பது இங்கே பதிவுக்கு சம்பந்தமில்லாத தகவல்.

 

அடுத்து கலந்துரையாடல் ஆரம்பித்தது. முதல் கேள்வியை நான் தொடங்கிவைத்தேன். நூலை விமர்சனம் செய்த ப்ரவாஹனுக்கு எதிரான விமர்சனம் அது. 'நூலில் போதிய தரவுகள் இல்லாமல் அனுமானத்தின் பேரில் நூலாசிரியர் எழுதியதாக விமர்சனம் வைக்கும் நீங்கள் உங்கள் மதிப்புரையின் போதே 'இருக்கலாம், இருந்திருக்கலாம்' என்று அனுமானத்தின் பேரில் மதிப்பீடு செய்கிறீர்கள். ஒரு விமர்சகருக்கு இருக்கும் இந்த அனுமான சுதந்திரம் எழுத்தாளருக்கு இருக்கக்கூடாதா?' என்றேன். உடனடியாக எந்த யோசனையும் செய்யாமல் என் குற்றச்சாட்டை மறுத்தார். மறுத்த அடுத்த நொடியே ஒரே ஒரு இடத்தில் அதுபோல சொல்லியிருக்கலாம் என்றவர் 'என்னை முட்டாள் என்று இந்த கேள்வியை கேட்டவர் நினைக்கிறார்' என்று அபாண்டமான குற்றச்சாட்டினை வைத்தார்.

 

இதற்கு மேல் இதுதொடர்பாக அவரிடம் விவாதம் நடத்த எனக்கு விருப்பமில்லை என்று விட்டுவிட்டேன். இந்துத்துவாவாதிகள் ஒரு வட்டத்துக்குள்ளாகவே விவாதம் நடத்த விரும்புவார்கள், வட்டத்தை விட்டு அவர்கள் வெளியே வரமாட்டார்கள். ஆனால் எதிர்விவாதம் செய்பவர்களை வட்டத்துக்குள் வந்தே ஆகவேண்டும் என்று வற்புறுத்துவார்கள் என்பதையெல்லாம் ஏற்கனவே அறிந்திருந்தாலும் அந்நேரத்திலும் குணசேகரனுக்கு ஆதரவான சிறுகுரலையாவது ஒலிக்க வேண்டும் என்பதாலேயே அக்கேள்வியை மட்டும் முன்வைத்தேன்.

 

அடுத்து விவாதம் பல்வேறு முனைகளை தொட்டுச் சென்றது. மரபணு ஆராய்ச்சித் தொடர்பான பேச்சும் வந்தது. கூட்டத்துக்கு வந்திருந்த ஒருவர் 'ஏராளமான ஆராய்ச்சி முடிவுகளை அரசு நிறுத்தி வைத்திருக்கிறது. இதுதொடர்பான ஆராய்ச்சிகளை தொடர்ந்து நடத்தவும் முட்டுக்கட்டை போட்டிருக்கிறது' என்ற அதிர்ச்சிகரமான தகவலை சொன்னார். அது ஆதாரப்பூர்வமானதா அல்லது யூகத்தின் பேரிலானதா என்ற சந்தேகம் எனக்கு எழுந்தது. இதுபோன்ற பெரிய குற்றச்சாட்டுகளை பொத்தாம்பொதுவாக இதுபோன்ற கூட்டங்களில் வைத்துவிடுவது பெரிய பிரச்சினைகளை கிளப்பும்.

 

இந்த விவாதத்தை தொடர்ந்து பேசிய ஒரு தொல்லியல் ஆய்வு நிபுணர் (நெற்றியில் குங்குமம் நீட்டுவாக்கில் வைத்திருந்தார்) பாபர்மசூதியின் கீழ் ஆய்வு செய்யப்பட்டபோது ஒரு 'பெருமாள் கோயில்' இருந்ததாகவும், அதை இந்திராகாந்தி மறைத்துவிட்டார் என்றும் சொன்னார். அந்த அன்பர் இன்னமும் ஒரு இருபது அடி கீழே தோண்டி பார்த்திருந்தால் ஒரு பவுத்த மடாலயத்தையும் ஒருவேளை கண்டிருக்கலாம். இதெல்லாம் என்னவோ புதிய கண்டுபிடிப்புகள் என்பதைப் போல சொல்லிவருகிறார்கள். பவுத்த, சமண வழிபாட்டு நிலையங்கள் அழிக்கப்பட்டு வைணவ, சைவ ஆலயங்கள் எழுப்பப்பட்டதும், அவை அழிக்கப்பட்டு பிற்பாடு மசூதிகள் உருவாக்கப்பட்டதும் எல்லோருக்கும் தெரிந்த விஷயம் தான். பல நூற்றாண்டுகளுக்கு முன்னர் அரசர்கள் காலத்தில் நடந்தவற்றுக்கெல்லாம் இப்போதிருக்கும் நாகரிகமான மனித இனம் நியாய, அநியாயங்கள் கற்பிக்க முடியாது. வரலாறுக்கு ஏது நீதியும்? அநீதியும்?

 

நிகழ்வின் பெரும்பாலான நேரத்தை இருளர்களே ஆக்கிரமித்துக் கொள்ள பத்ரி இடையில் புகுந்து செங்கிஸ்கானையும் கொஞ்சம் கவனிக்கலாம் என்றார். அதிஷா, ஓகைநடராஜன் உள்ளிட்டவர்கள் செங்கிஸ்கான் குறித்து கேள்விகள் கேட்டும், தாங்கள் அறிந்தவற்றையும் பகிர்ந்துகொண்டார்கள்.

 

இருளர்கள் - ஓர் அறிமுகம் நூல் குறித்த ஹரன்பிரசன்னாவின் விமர்சனம்

 

ஐந்தாம் நாள் நிகழ்வு குறித்த ஹரன்பிரசன்னாவின் ஹேப்பி பதிவு :-)

 

 

 

பதிவுக்கு சம்பந்தமில்லாத விளம்பரம் : இன்று (27-12-08) மாலை ஐந்து மணியளவில் சென்னை, தியாகராயநகர் நடேசன் முதலியார் பூங்காவில் வலைப்பதிவர் சந்திப்பு நடைபெற இருக்கிறது. பதிவர் விருது, சூடான இடுகைகள் என்று பதிவுலகில் தற்போது நடந்துகொண்டிருக்கும் விஷயங்கள் குறித்த சூடான விவாதங்கள் நடைபெறும் என்று தெரிகிறது. மேலும் 'மணமானவர்களின் மனக்குமுறல்கள்' என்ற தலைப்பையொட்டி விவாதிக்க வேண்டும் என்று பதிவர் தாமிரா பலகாலமாகவே வற்புறுத்தி வருகிறார். சமீபத்தில் 1970களில் திருமணம் செய்துகொண்ட பதிவர்களும் இதுதொடர்பாக தங்களது அனுபவங்களை பகிர்ந்துகொள்வார்கள் என்று நம்புகிறேன். அதுமட்டுமன்றி திருமங்கலம், நாடாளுமன்றத் தேர்தல் என்று அரசியலும் களைகட்டுமென தெரிகிறது.

 

பிரபல பதிவர்களும், பத்திரிகையாளர்களும், எழுத்தாளர்களும் கலந்துகொள்வார்கள் என்று அதிஷா நம்பிக்கை தெரிவித்திருப்பதால் கலந்துகொள்ள வாய்ப்பிருக்கும் அனைவரும் கட்டாயம் கலந்துகொள்ள வேண்டுமாய் வேண்டி விரும்பி கேட்டுக் கொள்கிறேன்.

 

சந்திப்பு தொடர்பான மேல்விவரங்களுக்கு : அதிஷா (9884881824), முரளிகண்ணன் (9444884964), லக்கிலுக் (9841354308), கேபிள்சங்கர் (9840332666)