சாரு நிவேதிதா தற்கொலை முயற்சி!

நேற்று மாலை திடீரென்று நண்பர் ஒருவர் தொலைபேசி 'சாரு நிவேதிதா தற்கொலைக்கு முயன்றாரா?' என்று கேட்டார். குட்டிக்கதைகள் நூற்றியெட்டின் 86வது பாகத்தில் 'கண்ணாயிரம் பெருமாளின் தற்கொலை முயற்சி' என்றொரு கதை எழுதப்பட்டிருந்தது. பெருமாள் யாரென்று சாருவின் வாசகர்கள் எல்லோருக்குமே தெரிந்திருந்தபோதிலும் சாருவின் கதைகளில் எது உண்மை, எது புனைவென்று பிரித்தறிந்து வாசிக்கும் அறிவு எல்லோருக்கும் அமைந்துவிடுவதில்லை. இது சமீபத்தில் நடந்ததா? அல்லது சில ஆண்டுகளுக்கு முன்பு நடந்ததா? என்றொரு குழப்பமும் சிலருக்கு ஏற்பட்டிருக்கக் கூடும்.

ஆயினும் குட்டிக்கதைகளை இனி விஷால் தொடருவார் என்ற அறிவிப்பு சாரு வாசகர்களிடையே பெரியளவிலான அதிருப்தியையும் ஏற்படுத்தியிருந்தது. அந்தப் பதிவு 17.11.2008 அன்று மாலை 5.30 மணியளவில் எழுதப்பட்டிருக்கிறது. 'சாருவாவது, தற்கொலையாவது' என்றுதான் எல்லோரையும் போல நினைத்தேன். அதற்கு ஓரிரு தினங்களுக்கு முன்பாக சாரு என்னோடு தொலைபேசியிருந்தார். வழக்கமான தெளிவான, தீர்க்கமான குரலோடு அவர் பேசியிருந்ததால் 'தற்கொலை முயற்சி' என்பதை என்னால் சுத்தமாக நம்பவே முடியவில்லை. ஆனால் அவர் பேசியதிலிருந்து அவரது மனைவிக்கு அனானிமஸாக எவனோ தொலைபேசி மனரீதியாக டார்ச்சர் கொடுத்துக் கொண்டிருக்கிறான் என்பதை புரிந்துகொள்ள முடிந்தது. ஏதோ பிரச்சினை என்றளவில் புரிதல் இருந்தது. இந்த அளவுக்கு போயிருக்கும் என்பதை இப்போது கூட நம்பமுடியவில்லை.

சாருவின் தோழரான ஆர்.பி.ராஜநாயகம் அவர்களின் Something is rotten in the State of Denmark பதிவினை வாசித்தபோது தற்கொலை முயற்சி உண்மைதானோ என்று எண்ணத் தோன்றுகிறது. இன்னொரு புறம் சாரு கூடவா தற்கொலைக்கு முயற்சிப்பார் என நொந்துப் போயிருக்கிறேன். அவருக்கு தொலைபேசியோ அல்லது குறுஞ்செய்தி மூலமாகவோ விசாரிக்க அச்சமாக இருக்கிறது. ஒருவேளை செய்தி உண்மையென்றால் என் மனதுக்குள் ஏற்படுத்தி உருவகப்படுத்தி வைத்திருக்கும் சாரு பற்றிய பிம்பத்தின் பெரும்பகுதி உடைந்துவிடுமோ என்று அஞ்சுகிறேன்.

நிலவரம் என்னவென்று தெரிந்தவர்கள் யாராவது தெளிவாக சொன்னால் தேவலை. சாரு.ஆன்லைனில் வழக்கம்போல தலையை சுற்றி மூக்கை தொட்டு தான் சொல்லப்படும், யாருக்கும் புரியாது.


பிற்சேர்க்கை (இப்பதிவு எழுதி ஒரு மணி நேரத்துக்கு பிறகு சேர்க்கப்பட்டது) : அதிசயங்களில் எனக்கு நம்பிக்கையில்லை, ஆனாலும் அவ்வப்போது நான் காணும், கேட்கும் அதிசயங்கள் சுவாரஸ்யமானவை. இந்தப் பதிவை வருத்தத்தோடு எழுதி பப்ளிஷ் பட்டன் அழுத்திய நொடியிலேயே எனது கைப்பேசி கிணுகிணுத்தது. 'CHARU CALLING' - இன்னும் கூட இப்பதிவை சாரு பார்த்திருக்க வாய்ப்பில்லை.

”வணக்கம்பா. சாரு பேசுறேன்”

“சார். ஒரு வதந்தி..”

“என்ன?”

“இனிமேல் குட்டிக்கதைகளை விஷால் தொடரப்போறாருன்னு சாரு.ஆன்லைனில் வந்திருக்கே?”

“ஆமா. நாம எழுதறதெல்லாம் நடப்பும், புனைவும் இணைந்தது தான். கவலைப்படறதுக்கெல்லாம் ஒண்ணுமில்லை. பெரிய பிரச்சினையெல்லாம் எதுவுமில்லை”

- இப்படியாக தொடர்ந்தது. எனவே சாரு வாசகர்களே, நலம் விரும்பிகளே! வழக்கம்போல நாம் குட்டிக்கதை ஜோதியில் ஐக்கியமாகிவிடலாம்.