பந்தயம் - திரைவிமர்சனம்!

'நன்றி : இயக்குனர் பேரரசு' என்ற டைட்டிலை பார்த்ததுமே தெரித்து ஓடியிருக்க வேண்டும். தெரியாத்தனமாக மாட்டிக் கொண்டோம். பந்தயம் என்றதுமே நமக்கு ஆமைக்கும், முயலுக்குமான பந்தயம் தான் நினைவுக்கு வரும். இங்கேயோ எறும்புக்கும், அமீபாவுக்கும் பந்தயம் விட்டிருக்கிறார்கள். என்னத்தை சொல்வது? இன்னமும் நாளைய தீர்ப்பு, மாண்புமிகு மாணவன் ரேஞ்சிலேயே இருக்கிறார் புரட்சி இயக்குனர் எஸ்.ஏ.சந்திரசேகர். இந்த லட்சணத்தில் தியேட்டருக்கு முன்னால் இவருக்கு கட்டவுட், பேனர் என்று அமர்க்களப்படுகிறது (நாளைய தமிழகமாம்).

உசிலம்பட்டியில் இருக்கும் சிறுவன் விஜய் ரசிகனாக யாருக்கும் அடங்காமல் அடங்காப்பிடாரியாக வளர்கிறான். இதே நேரத்தில் திருச்சியில் ரவுடி மாசாணம் அரசியலில் சேர்ந்து வளர்ந்து வருகிறான். பத்து ஆண்டுகளுக்கு பிறகு இவர்கள் இருவரும் சென்னையில் சந்திக்கிறார்கள். சிறுவன் கல்லூரி மாணவன். மாசாணம் மாண்புமிகு அமைச்சர். அமைச்சரின் தங்கையை கல்லூரி மாணவன் சவால் விட்டு காதலிக்கிறான். அமைச்சருக்கு அல்லக்கையாக இருந்துகொண்டே அவரது தங்கையை ரகசியமாக காதலிக்கிறான். ஆனால் காதலிப்பது இவன் தான் என்று அமைச்சருக்கு தெரியாது.

போனில் சவால் விடுகிறான். பதிலுக்கு உன்னை கொன்னுடுவேன், புதைச்சுடுவேன் என்று அமைச்சர் சவடால் விடுகிறார். அவன் மறுபடியும் சவால் விட, இவர் மறுபடியும் சவடால் விட, இரண்டரை மணி நேரப்படமும் இதுதான். இருவருக்குமான பந்தயத்தில் ஜெயித்தது யார் என்று நான் சொல்லிதான் தெரியவேண்டுமா என்ன? அமைச்சர் மகளை மாணவன் ஏன் தேர்ந்தெடுத்து காதலிக்கிறான் என்பதற்கு ஒரு மொக்கை பிளாஷ்பேக் வேறு. போதும்டா சாமி.

கடியான இந்தப் படத்தில் இரண்டு காட்சிகளில் இளையதளபதியும் வருகிறார். விஜய்யை காண ஊரைவிட்டு ஓடிவரும் குட்டி ரசிகர்களுக்கு 'நல்லா படிங்க' என்று அட்வைஸ் செய்கிறார். இன்னொரு ஷூட்டிங் காட்சியில் அரசியல்வாதிகளையும், கெட்ட போலிஸையும் கேள்வி கேட்கிறார். மக்களுக்கு தான் செய்துவரும் நல்லதுகளை பட்டியல் போடுகிறார். படம் முழுக்க விஜய் வராத காட்சிகளிலும் கூட விஜயபரணி தாராளமாக பாடப்படுகிறது, இதற்காகவே ஹீரோ விஜய் ரசிகர் என்று சித்தரிக்கப்பட்டிருக்கிறது. ஆறரை கோடி மக்களின் இதயங்களில் வாழுகிறாராம். 2016ல் ஆட்சி அமைப்பேன் என்று இன்னும் இரண்டு வருடங்களில் விஜய் கலைஞருக்கு சவால் விடலாம்.

ஹீரோ நிதின் சத்யா. வளர்ந்துவரும் நேரத்தில் எஸ்.ஏ.எஸ். படத்தில் நடிக்க ஒப்புக்கொள்ளலாமா? சூர்யாவையே ‘பெரியண்ணா' மூலமாக புதைகுழிக்குள் தள்ளியிருப்பார். நல்லவேளையாக மவுனம் பேசியதே வந்து அவரை காப்பாற்றியது. நிதின் சத்யா குள்ளமாக இருக்கிறார், கலர் கொஞ்சம் கம்மி, முண்டைக்கண். ஆண்பாவம் பாண்டியராஜனை பார்ப்பது போலிருக்கிறது. சென்னை-28, சத்தம் போடாதே படங்களில் அட்டகாசமாக நடித்த இவர் பந்தயத்தில் ஓவராக திணறியிருக்கிறார். ஹீரோவுக்கு துணையாக அசத்தப்போவது யாரு நிகழ்ச்சியில் ரஜினி, வடிவேலு வேடத்தில் வருபவர்களும், டாப் 10 கணேசும். இந்தப் படத்தை பார்ப்பதற்கு பதில் நிம்மதியாக அசத்தப் போவது யாருவையே பார்க்கலாம்.

மட்டமான கதை, திரைக்கதை இருந்தால் இனிமேல் பிரகாஷ்ராஜ் ஒத்துக்கொள்ளக் கூடாது. ஒன்மேன் ஆர்மி மாதிரி இந்த மொக்கைப்படத்தை தனது சகலகலா திறமைகளால் நிமிர்த்திவிட பார்க்கிறார். ம்ஹூம்.. விழலுக்கு இறைத்த நீர். தேவையே இல்லாமல் ராதிகாவும் வீணடிக்கப்பட்டிருக்கிறார். ஒரு துணை நடிகை நடிக்க வேண்டிய கேரக்டர் இது. படம் ஆரம்பித்த பத்து நிமிடத்திலேயே க்ளைமேக்ஸில் ராதிகா என்ன செய்யப்போகிறார் என்று சுலபமாக யூகிக்க முடிகிறது.

கோடையில் கிடைத்த குளிர்தருவைப் போல படத்தில் கவரும் அம்சம் சிந்து துலானி. நேருக்கு நேர் சிம்ரனைப் போலவே நெற்றி, கூர்மையான மூக்கு, பலாச்சுளைப்போல உதடு, கவர்ச்சியான முகவாய், சங்குபோன்ற கழுத்து, அப்புறம்... ஜப்பான் பொம்மை போல பளிங்கு இடுப்பு என்று ஜல்சாவாக இருக்கிறார். இன்னும் ஒரு காட்டு காட்டியிருக்கலாம்.

விஜய் ஆண்டனியின் இசையா இது என்று தெரியவில்லை. கொடுமை. நல்லவேளையாக சிலோன் மனோகரின் ரெண்டு பாட்டினை ரீமிக்ஸ் செய்து ஓரளவுக்கு காப்பாற்றுகிறார். சின்ன மாமியே, சுறாங்கனி ரெண்டு பாட்டுக்கும் தியேட்டரே எழுந்து ஆடுகிறது. ஒளிப்பதிவு உள்ளிட்ட ஏனைய அம்சங்கள் மெகாசீரியல் ரேஞ்சுக்கும் கீழே.

பந்தயம் - படுமோசம்!